கூகுள் தரும் ஆங்கில சொல் எழுத்து சோதனை தளம்

கூகுள் அண்மையில் இன்னும் ஒரு குரோம் சோதனை தளம் ஒன்றைத் தொடங்கியுள்ளது. 

இந்த தளத்தின் மூலமாக, ஆங்கிலச் சொற்களின் எழுத்துக்கள் சார்ந்த நம் திறனை சோதனை செய்து கொள்ளலாம். 

இது Spell Up என அழைக்கப்படுகிறது. இது ஒரு விளையாட்டு விளையாடுவதைப் போன்ற அனுபவத்தைத் தருகிறது. இருப்பினும் இதனை ஆங்கிலச் சொற்களைக் கற்றுக் கொள்ளும் அனுபவமாகவும் எடுத்துக் கொள்ளலாம். 

இப்போது நாடெங்கும் நடத்தப்படும் spelling bee என்ற போட்டிகளில் கலந்து கொள்பவர்களுக்கு இந்த சோதனைத் தளம் அதிகம் பயன் தரும். இந்த தளம் எப்படி செயல்படுகிறது என்று காட்டிட சிறிய வீடியோ படம் ஒன்று http://googleblog.blogspot.com/2014/05/speak-and-learn-with-spell-up-our.html என்ற முகவரியில் உள்ள இணைய தளத்தில் கிடைக்கிறது. ஆர்வமுள்ளவர்கள் முதலில் இதனைக் காணலாம்.

இந்த கேம் உள்ள இணைய தளம் https://spellup.withgoogle.com/ என்ற முகவரியில் இயங்குகிறது. இந்த தளம் சென்றவுடன், இது காட்டும் கிராபிக்ஸ் அனிமேஷன் படங்கள் பார்ப்பதற்கு ஆர்வத்தினைத் தூண்டுகின்றன. 

இந்த கேம் விளையாடுவதற்கு ஸ்பீக்கர் மற்றும் மைக் ஆயத்த நிலையில் இருக்க வேண்டும். அவை இல்லை என்றால், விளையாட்டினை மேற்கொள்ள நமக்கு அனுமதி கிடைக்காது. பெர்சனல் கம்ப்யூட்டர் அல்லது லேப்டாப் கம்ப்யூட்டரில் இதனை விளையாடுவதைக் காட்டிலும், ஸ்மார்ட் போனில் விளையாடுவது எளிதாக உள்ளது. 

கூகுள் குரோம், ஆண்ட்ராய்ட் ஸ்மார்ட் போன் வழியாக என்றால், விளையாடுகையில் நாம் சொற்களை உச்சரித்தும் விளையாடலாம். மற்ற ஐபோன், ஐபேட் சாதனங்கள் வழி என்றால், டைப் செய்து மட்டுமே விளையாட முடியும். 

ஆங்கில மொழியை முதல் மற்றும் இரண்டாவது மொழியாகக் கொண்டவர்களுக்கு, விளையாட்டு வாக்கில் அதன் சொற்கள், அவற்றின் எழுத்து ஆகியன குறித்து அறிந்துகொள்ள இந்த தளம் மிகவும் உதவும். ஸ்பெல்லிங், எப்படி உச்சரிப்பது, இல்லாத எழுத்தைக் கண்டுபிடிப்பது எனப் பல வகைகளில் இதனை விளையாடலாம். 

சரியான விடை அளிக்க, அளிக்க பக்கத்தில் ஒரு கோபுரம் எழுப்பப்படும். தவறான விடை தரும்போது, அந்த கோபுரம் சரியும். உங்களின் ஆர்வத்தைத் தூண்டி, ஆங்கிலச் சொற்களைக் கற்றுக் கொள்வதனை எளிதாக்குகிறது இந்த தளம்.